Ver a listaxe definitiva de participantes a este concerto especial que terá lugar o próximo mes de maio, a xeito de inicio do Festival Mozart 2011.

Como presidente do Consorcio para la Promoción de la Música, que valoración fai da obtención do Premio Cultura Galega da Música?
É un recoñecemento máis a unha traxectoria de excelencia, a un proxecto cultural dos máis importantes, por non dicir o maior, que existe en Galicia; un proxecto consolidado e vivo que realiza, ademais, un impagable labor de difusión e mais de recuperación dos compositores galegos.

Este premio chega nun momento especialmente complexo, no que á conxuntura económica se refire. Neste contexto, é a cultura máis necesaria ca nunca?
Desde logo que si. Malia as actuais dificultades económicas, a cultura é un piar imprescindible do estado do benestar. A cultura non é un luxo nin un gasto, senón que é un investimento, unha necesidade social e débense facer os esforzos necesarios para preservar aqueles proxectos que, como a OSG, sexan ademais un sinal de identidade desta cidade.

O mestre Víctor Pablo Pérez resaltaba recentemente a aposta da cidade da Coruña a prol dun modelo cultural que inclúe unha complexa rede de museos, a consolidación do propio Consorcio para la Promoción de la Música… Contan vostedes, desde a administración, coa complicidade do sector privado ou é aínda a iniciativa pública a encargada de liderar este proxecto?
O desexable, e nese aspecto a OSG é un modelo para imitar, é a combinación de ambas as dúas iniciativas: a pública e mais a privada. Sempre desde o liderado institucional pero coa participación de grandes empresas que, precisamente pola súa importancia, saben que o investimento cultural lles supón unha rendibilidade social moi importante. Esta aposta e este modelo cultural deben ser tidos en conta por todas as administracións, algo que desgraciadamente deixou de ocorrer.

Achegar a cultura á cidadanía é un dos obxectivos que explican a creación deste Consorcio. Como valora a posta en marcha, no vindeiro mes de maio, do primeiro concerto participativo -Carmina Burana- destas características en Galicia?
É un proxecto magnífico que se suma a outras iniciativas que xa desenvolve a Sinfónica, como os concertos de verán en María Pita, que se converteron nunha das citas imprescindibles da nosa semana grande. A cidade sente a Sinfónica como algo propio, e iniciativas como esta contribúen a reforzar ese lazo.

Un desexo para o vindeiro ano…
Que a OSG siga a ser a mellor orquestra de España e o orgullo dos coruñeses grazas ao traballo de todos.

A Orquestra Sinfónica de Galicia recolleu o pasado venres, 17 de decembro, o premio Cultura Galega da Música agradecéndolle a “esta comunidade tan xenerosa” un galardón que recoñece o compromiso “artístico e musical” que marcou o camiño seguido pola orquestra galega desde a súa fundación en 1992.

O xerente da OSG, Oriol Ponsa, recolleu o premio en nome de todos os integrantes do conxunto musical e no de Víctor Pablo Pérez, o seu director musical.

Ponsa destacou o “traballo feito ao servizo” da cultura galega, mentres que o director da Fundación Barrié de la Maza, Javier López Martínez -–premio ás Iniciativas a prol do Patrimonio Cultural— fixo fincapé na capacidade de xerar emprego na recuperación patrimonial e na necesidade de colaboración para este tipo de proxectos.

Na foto, Ponsa recibe o premio de mans do conselleiro de Cultura, Roberto Varela, e do presidente Núñez Feijóo.

Fuente OSG – Europa Press

A Fundación Barrié e Banco Pastor ofrecerán o 4 de xaneiro, na Coruña, como Concerto de Reis 2011 a actuación de Michael Nyman acompañado pola Orquestra Sinfónica de Galicia. O recoñecido pianista e compositor británico Michael Nyman ha de interpretar unha selección das súas máis coñecidas creacións para o mundo do cine, entre as que se atopa a banda sonora do filme “O Piano”, xunto ás composicións orquestrais “A dance he little thinks of” e “MGV” (Musique à Grand Vitesse). A Orquestra Sinfónica de Galicia será dirixida nesta ocasión por Josep Vicent, director artístico de La Orquesta del Mundo. A Fundación Barrié e Banco Pastor ofrécenlle este concerto ao público gratuitamente, previa retirada de invitacións a véspera do concerto na sede da Fundación da Coruña, a partir das 20.00 horas. Ademais, parte do aforo poderase reservar pola Internet, entre o 28 e o 30 de decembro en www.fundacionbarrie.org.

Para ler a nota de prensa completa, aquí.

Ver resumo de prensa sobre esta noticia, aquí.

Xa dispoñible en liña desde o pasado venres, 17 de decembro.

Ver a listaxe definitiva de participantes a este concerto especial que terá lugar o próximo mes de maio, a xeito de inicio do Festival Mozart 2011.

As solicitudes proveñen de toda a provincia da Coruña, pero tamén de Ourense, Lugo e Pontevedra. A maioría de aspirantes pasaron audición a pasada semana na Escola Municipal de Música da Coruña (cerca de 80); 9 en Culleredo (Conservatorio) e 10 en Ferrol (Conservatorio Xan Viaño).

Unha vez efectuada a selección polo Tribunal, os alumnos que superasen a audición poderanse matricular como alumnos na Orquestra de Nenos da Sinfónica de Galicia.

As listaxes de admitidos ás probas e os resultados destas serán expostos de maneira pública no taboleiro de anuncios das Oficinas do Consorcio para la Promoción de la Música e mais na páxina web da OSG (www.sinfonicadegalicia.com). Poderase establecer a posibilidade de alumnos reservas entre os non admitidos. Todas as comunicacións cos aspirantes e os alumnos da ONSG se han de efectuar exclusivamente por correo electrónico.

Xuntamos a continuación a listaxe FINAL de admitidos para participar no ‘Carmina Burana’ participativo que terá lugar o vindeiro mes de maio, a xeito de concerto inaugural do Festival Mozart 2011.

A propósito da posta en marcha do Carmina Burana participativo que abrirá o Festival Mozart 2011

FM: Unha vez realizada a preselección das voces, está sorprendido polo nivel dos candidatos? Poderán contar cun corpus vocal suficientemente homoxéneo? En que se baseou para escoller as voces?
JC: Unha gran maioría dos candidatos teñen ou tiveron algunha experiencia coral e isto resulta esperanzador. En canto ao equilibrio das cordas, acontece o que na actualidade é habitual: maioría ou predominio claro de voces femininas sobre as masculinas. Aínda así, a selección realizouse en función dos datos recibidos: da súa experiencia, ou non, vocal-coral e dos seus coñecementos musicais. Si nos resulta satisfactorio especialmente que se inscribisen participantes non só da cidade da Coruña senón tamén de moitos outros lugares de Galicia.

FM: Participou anteriormente en iniciativas deste tipo (convocatorias participativas)? Que retos presentan este tipo de concertos?
JC: Aquí, en Galicia, co Coro da OSG, e igualmente coa Coral Universidad de las Islas Baleares (da cal son director-fundador) colaborei en diferentes ocasións en proxectos deste tipo (Mesías de Haendel, a Novena de Beethoven, etc.) e sempre se converteron en ocasións excelentes para poder gozar de grandes masas corais, dirixidas por batutas de recoñecido prestixio. No caso deste Carmina Burana, debo apuntar que é a primeira vez que se realiza un proxecto autenticamente participativo en Galicia no cal contamos con participantes individuais. Coido que é unha ocasión excepcional para que moita xente que escoitou xa a Orquestra Sinfónica de Galicia se poida implicar nunha interpretación dunha maneira máis clara: isto é, cantando xunto á orquestra.

FM: Moi brevemente, fálenos da obra. Para aqueles que non a coñezan, como definiría vostede –a nivel estilístico– Carmina Burana?
JC: Coido que Carmina Burana é unha desas obras que todo o mundo coñece, se non integramente si algún fragmento que poden recoñecer a través de anuncios de televisión, etc. É unha obra que destila antigüidade –reminiscencias antigas, sen dúbida ningunha– pero que grazas á súa vivacidade rítmica, harmónica e, sobre todo, de timbre, se converte nunha obra actual e sedutora para este tipo de concertos participativos.

FM: Por último, que rol terán os coros de reforzo?
JC: Han de servir para lles axudar aos participantes e ao mesmo tempo realizarán un rol estereofónico. Van ser unha axuda importante para garantir que os participantes individuais non sufran ningún tipo de ‘medo escénico’. Trátase de contribuír á seguridade dos participantes individuais, que han de ser os auténticos protagonistas deste concerto.

Para consultar as listaxes provisionais de admitidos e excluídos, facer clic aquí.

Ver calendario de próximas accións:
- Venres, 17 de decembro, publicación na páxina web do Festival do calendario DEFINITIVO de admitidos.
- Sábado, 22 de xaneiro, 11.30 / 13.30 horas, Primeiro ensaio (Palacio da Ópera da Coruña). Entregaráselles a partitura aos participantes.
- Sábado, 29 de xaneiro, 11.30 / 13.30 horas, Ensaio.

A Xunta de Galicia concedeulle o Premio Cultura Galega da Música á Orquestra Sinfónica de Galicia, pola súa traxectoria de creación e expansión da música galega. A candidatura da OSG foi presentada pola Real Academia Galega de Belas Artes e por outros membros do xurado e foi aprobada este martes, 16 de novembro, por maioría.

Doutra banda, o pasado xoves, 25 de novembro, o director da Orquestra Sinfónica de Galicia, Víctor Pablo Pérez, recibiu a Medalla de Académico Correspondente da Real Academia Galega de Belas Artes nun acto que se abriu cun concerto do Cuarteto Scherzo.

Con este nomeamento, a Real Academia Galega de Belas Artes quere recoñecerlle a Víctor Pablo Pérez —director titular da OSG desde 1993— “o importante labor levado a cabo ao longo de moitos anos na creación e consolidación de agrupacións orquestrais, merecendo unha mención moi especial ao seu traballo coa Orquestra Sinfónica de Galicia”.

Se te queres sumar aos seguidores do Festival Mozart, pódelo facer a través das canles habilitadas para iso en Facebook e mais en Youtube.
Lembrámosvos os enderezos:

www.facebook.com/festivalmozart

www.youtube.com/festivalmozart