As recoñecidas pianistas Katia & Marielle Labèque centran a atención da próxima fin de semana grazas ao concerto programado polo Festival Mozart 2010 no Palacio da Ópera. Despois da cancelación do director Giovanni Antonini, o director de orquestra e concertino do prestixioso grupo Il Giardino Armonico, Enrico Onofri, será o encargado de dirixir as intérpretes galas no concerto que ha de ter lugar o vindeiro sábado, 5 de xuño, ás 21 horas, no Palacio da Ópera. Para a ocasión, as irmás Labèque interpretarán o Concerto para dous pianos e orquestra de Mozart, unha obra de referencia que elas mesmas comentan nesta breve entrevista.

Katia & Marielle Labèque, para o Festival Mozart 2010

FM: É a súa primeira vez en Galicia?

K&ML: A verdade é que xa estiveramos antes aquí pero resulta para nosoutras un pracer volver a Galicia e, en especial, á cidade da Coruña.

FM: Moi brevemente: cales son as particularidades que presenta o Concerto para dous pianos e orquestra de Mozart?

K&ML: Un pouco todas as que podemos atopar na música de Mozart… En realidade, trata os retos de toda a súa música: pode cambiar, modificar o carácter de xeito moi rápido, levándote a acadar todo tipo de emocións nun prazo de tempo moi curto. Este é un concerto realmente marabilloso, cheo de vida, repleto de diálogos entre os dous pianos. É un pouco semellante ao que acontece nunha ópera.

FM: Vostedes traballaron anteriormente con Enrico Onofri. Como describirían a súa colaboración musical?

K&ML: Coñecemos a Onofri como líder de Il Giardino Armonico, onde sen lugar a dúbidas exerceu unha grande influencia musical, non só a nivel de conxunto senón tamén de maneira directa sobre todos os músicos deste grupo. Para nosoutras, o seu talento resultou tamén unha fonte de grande inspiración.

Máis tarde puidemos traballar por primeira vez con el en Portugal, onde tivemos unha experiencia fantástica precisamente tocando este concerto de Mozart coa súa orquestra Il Divino Sospiro.

Estamos, neste sentido, realmente contentas de tocar con el nesta nova ocasión.

FM: Despois das súas últimas (e recentes) gravacións discográficas, editadas co seu propio selo, en que proxectos están a traballar na actualidade?

KL: En relación cos nosos últimos discos, pódense atopar en:

http://www.kmlrecordings.com/recordings/satie/satie.html

http://www.kmlrecordings.com/recordings/somh/somh.html

Na nosa páxina pódense atopar os detalles sobre o disco de Satie e tamén en relación co meu traballo Shape of my Heart, que inclúe dúos con Sting, Herbie Hancock ou Chick Corea, entre outros (www.kmlrecordings.com).

Doutra banda,  en outubro de 2010 gravarei un novo disco, neste caso B for Bang Beatles, co grupo que creei con David Chalmin (guitarra) e Nicola Tescari (teclados). Sobre este proxecto, pódese atopar máis información en:

http://www.kmlrecordings.com/recordings/bforbang/bforbang.html.

Por último, na primavera de 2011, e xa con Marielle, gravaremos o álbum Gershwin/Bernstein, proxecto co cal imos realizar unha xira por Italia e Francia ao longo do mes de marzo de 2011.

Para saber máis sobre Katia & Marielle Labèque:

Prensa:

http://www.kmlrecordings.com/press.html

Críticas:

http://www.labeque.com/interviews/index.asp

Actualidade:

http://www.labeque.com/news/index.asp

Sobre Enrico Onofri, director: http://www.enricoonofri.com

Atención: debido ao cambio de director musical, o programa deste concerto sufrirá tamén unha modificación. Interpretarase a Sinfonía número 40 en sol menor, KV 550, de Mozart (en lugar da Sinfonía número 5 en si bemol maior, D485, de Schubert).

Os concertos de Andreas Staier como artista en residencia son:

Andreas Staier, piano, e Isabelle Faust, violín

Obras de Carl Maria Von Weber, Ludwig Van Beethoven e Robert Schumann

Teatro Colón Caixa Galicia, domingo, 6 de xuño, ás 21 horas

Andreas Staier, piano

Obras de Franz Schubert, Ludwig Van Beethoven e outros autores con variacións sobre temas de Anton Diabelli

Teatro Colón Caixa Galicia, martes, 8 de xuño, ás 21 horas

Andreas Staier, piano

Orquestra Sinfónica de Galicia

Jaime Martín, director

Obras de Wolfgang Amadeus Mozart, Antonio Salieri e Ludwig Van Beethoven

Teatro Colón Caixa Galicia, sábado, 12 de xuño, ás 21 horas

Vídeo recomendado sobre Andreas Staier, tamén na Canle do Festival Mozart en Youtube:

http://www.youtube.com/watch?v=gPyfodkXOLo

http://www.youtube.com/festivalmozart

Ler máis en: http://www.scherzo.es/?q=node/293

A Real Academia Galega de Belas Artes Nosa Señora do Rosario nomeou o mestre Víctor Pablo Pérez “Académico Correspondente” na sesión ordinaria que se levou a cabo o sábado 29 de maio na Coruña. A Real Academia (www.academiagallegabellasartes.org) explica que co seu nomeamento se recoñece “o importante labor levado a cabo ao longo de moitos anos na creación e consolidación de agrupacións orquestrais”, e salienta, especialmente “o seu traballo coa Orquestra Sinfónica de Galicia” —que conta xa coa Medalla de Honor da Academia—, agrupación á que Víctor Pablo “levou a se converter nun referente ineludible na música española actual”.

A mesma presidenta da Real Academia Galega de Belas Artes, Mercedes Goicoa, comunicoulle persoalmente o nomeamento ao mestre Víctor Pablo Pérez pasadas as 13 horas do mesmo sábado, 29 de maio. Logo de coñecer a nova, o director titular da Orquestra Sinfónica de Galicia amosouse “moi orgulloso e agradecido por este nomeamento dunha institución de tanto prestixio como a Real Academia Galega de Belas Artes”.

A pasada fin de semana tivo lugar a presentación de dous novos ciclos do Festival Mozart 2010, articulados en colaboración cos Museos Científicos Coruñeses (www.casaciencias.org/gl). O primeiro deles, Festival no Mar, terá lugar todos os venres, ás 21 horas, no Aquarium Finisterrae (ver imaxes da actuación do Quinteto do Grupo Instrumental Siglo XX, o pasado 28 de maio).

Fotos: Miguel A. Fernández

Doutra banda, tamén a semana pasada se inaugurou o miniciclo Festival das Estrelas, en colaboración co Planetario da Casa das Ciencias. Na foto podemos ver a Sergei Rechetilov e Fernando Rodrigues, contrabaixos, na súa actuación Contrabaixisimo que abriu este ciclo o pasado domingo, 30 de maio. Esta proposta continuará o vindeiro 6 de xuño, ás 12 horas, co concerto interpretado polo Dúo Enharmony e que se titula As estrelas do violín e da viola.

Ambos os dous concertos (Casa dos Peixes e Planetario) achéganse con actividades complementarias: no primeiro caso, a visita á sala Nautilus; no segundo, a proxección simultánea do programa do Planetario Evolución.

Por último, convidámolos a lembrar algunhas das imaxes vinculadas á actuación, a pasada fin de semana, da compañía Comediants, no Teatro Colón Caixa Galicia. Nesta ocasión, tiveron lugar diversas representacións da ópera infantil e familiar A pequena frauta máxica, produción do Liceu de Barcelona, a partir da ópera A frauta máxica de Mozart. Numerosas familias e escolares encheron as representacións que tiveron lugar desde o pasado venres e ata o luns, 31 de maio.

Recordatorio: o concerto dos Nenos Cantores da OSG terá lugar en Betanzos o vindeiro domingo, 20 de xuño, ás 20.30 horas, na Igrexa de San Francisco. Ver fragmento vídeo dos Nenos Cantores da OSG en Youtube (www.youtube.com/festivalmozart).